د افغانستان برېښنا شرکت د مدیره پلاوي لومړنۍ ناسته د اوبو او انرژي په وزارت کې ترسره شوه
د افغانستان برېښنا شرکت د مدیره پلاوي لومړنۍ ناسته د اوبو او انرژي سرپرست وزیر محترم الحاج ملا عبداللطیف منصور تر سرپرستی لاندې، د وزارت د دفتر عمومي رئيس محترم قاري محمد عبدالعزیز عزیز، د وزارت د یو شمېر رئيسانو، د نوموړې مدیره پلاوي د غړو هر یو د مالیې وزارت د عوایدو معین محترم ملا عبدالقاهر ادریس، د اقتصاد وزارت مالي او ادارې معین محترم محمد عالم جمیل او د افغانستان برشنا شرکت د یو شمیر رئیسانو او مسؤلینو په ګډون د اوبو او انرژي په وزارت کې ترسره شوه.
که څه هم دا لومړنۍ او تعارفي غونډه وه، خو له وخت څخه په استفادې سره په دغه غونډه کې د افغانستان برېښنا شرکت د ۱۳۹۷، ۱۳۹۸ او ۱۳۹۹ هـ ش کلونو د مالي راپورونو، د هېواد او په ځانګړي توګه د کابل ښار د برېښنا اوسني وضعیت، د ضایعاتو د کمښت لپاره د تدابیري پلانونو او په افغانستان کې د ټاپ پروژې د اقتصادي تحلیل په هکله بحث او د اندونو تبادله وشوه او په دې برخه کې اړین تصمیمونه ونیول شول.
همدارنګه، په دې غونډه کې د افغانستان برېښنا شرکت عملیاتي رئیس محترم انجنیر صفی الله احمدزي د افغانستان برېښنا شرکت په ځانګړي ډول د تېرو دوکلونو د فعالیتونو او کړنو په هکله بشپړ معلومات د یوه پرزنټیشن په ترڅ کې وړاندې کړل.
