د افغانستان د اسلامي امارت د اوبو او انرژي سرپرست وزیر د ازبکستان هیواد د اوبو او انرژي وزیرانو او مل پلاوي سره وکتل.
د کتنې په پیل کې د اوبو او انرژي سرپرست وزیر الحاج ملا عبداللطیف منصور له ازبکستان څخه راغلي لوړ پوړي پلاوي ته ښه راغلاست ووایه او د هرات د زلزله ځپلو سره د دغه هیواد د مرستې په اړه یې له دوی څخه مننه وکړه.
الحاج ملا عبداللطیف منصور د یاد شوي پلاوي سره د سرخان پلخمري ۵۰۰ کیلو ولټ پروژې په اړه، د امو سیند پر سر د ۲۲۰ کیلو ولټ مزي د ترمیم، د وارداتی برېښنا د سیستم د ارزونې په موخه د هغه هیواد د تخنیکي ټیم استول، د لازیاتې وارداتي انرژي د جذب، په افغانستان کې د ازبکستان د خصوصي سکټور پانګونه او د اوبو د مدیریت په اړه بحث او نظرونه شریک کړل. د ناستې په پای کې د ازبکستان پلاوي د افغانستان د اوبو او انرژي سرپرست وزیر ته بلنه ورکړه چې د پورته ذکر شوو مواردو د حل په موخه په نژدې راتلونکي کې تاشکند ته رسمي سفر وکړي تر څو چې د پورتنیو مواردو په هکله نتیجې ته ورسیږي.
