د انرژي معینیت اونیزه تخنیکي او اداري ناسته ترسره شوه
دغه ناسته د وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشرې لاندې د رئيسانو او د انرژي سکتور د مسؤلینو په ګډون ترسره شوه.
په دغه ناسته کې، د بېلابېلو اداري او تخنیکي موضوعاتو په ځانګړې توګه په کلیو کې د برېښنا د تولید د کوچنیو پروژو د څېړلو په موخه د کلیو او پراختیا وزارت سره د همغږۍ، په ولایتونو کې د هایدرولیکي معلوماتو د شریکولو په موخه د اوبو معینیت سره د اړینو همغږیو د رامنځته کولو او په ولایتونو کې د انرژي زونونو سره د برېښنا ریاستونو د همغږۍ په هکله بحث او د اندونو تبادله وشوه.
د دفتر عمومي رئيس او د انرژي معینیت وارسي کوونکي د موضوعاتو تر ارزولو وروسته، د چارو د غوره پرمخ وړلو په موخه اړین هدایات ورکړل او ټینګار یې وکړ، چې د انرژي سکتور د پراختیا پنځه کلن پلان د پلي کولو په موخه باید عملي ګامونه واخیستل شي.
همدارنګه په دغه ناسته کې، د انرژي معینیت اداري او تخنیکي تلپاتې غړې تثبیت شول.
