د انرژي معینیت اونیزه تخنیکي او اداري ناسته ترسره شوه
دغه ناسته د دفتر د عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشري لاندې د دغه معینیت د رئیسانو، سلاکارانو او تخنیکي مسؤلینو په ګډون ترسره شوه.
په دغه ناسته کې، د انرژي معینیت د بېلابېلو تخنیکي او اداري موضوعاتو په هکله بحث او د اندونو تبادله وشوه او د موضوعاتو تر هر اړخیزې ارزونې وروسته د هغوی د ترسره کولو په موخه اړین تصمیمونه ونیول شول.
همدارنګه د نوموړې ناستې په بهیر کې هوکړه وشوه، چې د پانګونې د جذب ریاست د کاري لارښود د تنظیم په موخه دې ټول اړوند ریاستونه په ګډه سره کار وکړي، ترڅو ژر تر ژره نوموړی لارښود چمتو او د دغه ریاست چارې تنظیم او ګړندۍ شي. همدغه راز، ټینګار وشو چې د انرژي سکتور د ماسټر پلان د نوي کېدو په برخه کې د ریاستونو ترمنځ دې لا زیاته پاملرنه او همغږۍ وشي.
د دفتر عمومي رئيس په دغه ناسته کې د اړینو وړتیاوو د رامنځته کېدو، د انرژي سکتور د پراختیایي پلان د چمتو کېدو او په دغه معینیت کې د نورو ترسره شوو فعالیتونو ته نغوته وکړه او د انرژي سکتور د پراختیا وضعیت مخ پر ودې وباله او د چارو په ترسره کولو کې د لا ډېرو هڅو او نوښتونو په رامنځته کولو باندې ټینګار وکړ.
ښاغلي عزیز د انرژي معینیت مسؤلینو ته ډاډ ورکړ، چې خپلې ټولې هڅې به په کار واچوي، ترڅو د دغه معینیت د چارو د غوره ترسره کولو لپاره اړین تجهیزات او امکانات چمتو شي.
