د انرژي معینیت اونیزه تخنیکي او اداري ناسته ترسره شوه
دغه ناسته اوبو او انرژي وزارت د دفتر عمومي رئيس او د انرژي معینیت د غونډو وارسي کوونکي محترم قاري محمد عبدالعزیز عزیز تر مشري لاندې د دغه معینیت د رئيسانو، سلاکارانو او یو شمېر نورو تخنیکي مسؤلینو په ګډون ترسره شوه.
په دغه ناسته کې، هغو پانګوالو ته چې د برېښنایي تاسیساتو په جوړولو کې پانګونه کوي د جوازونو د ورکړې، هغو شرکتونو ته د اسانتیاوو د برابرولو په هکله چې د (PPP) په بڼه د اوبو او انرژي له وزارت سره تړونونه لاسلیکوي او یو شمېر نورو تخنیکي او اداري موضوعاتو په هکله بحث او د اندونو تبدله وشوه.
د ناستې په بهیر کې، اړوندو رئیسانو د نوموړو موضوعاتو په هکله معلومات وړاندې کړل او په اړه یې تر هر اړخیزو خبرو، اترو وروسته اړین تصمیمونه ونیول شول او د انرژي معینیت د غونډو وارسي کوونکي له لوري د چارو د غوره پرمخ وړلو په موخه اړینې سپارښتنې وشوې.
