د انرژي معینیت اونیزه تخنیکي او اداري ناسته ترسره شوه
دغه ناسته د دفتر د عمومي رئيس او د انرژي معینیت د غونډو د وارسي کوونکي محترم قاري محمد عبدالعزیز عزیز تر مشري لاندې د رئيسانو او د دغه معینیت د یو شمېر نورو تخنیکي مسؤلینو په ګډون ترسره شوه.
په دغه ناسته کې، د هغو موضوعاتو په هکله چې په تېره ناسته کې یې په هکله اړینې پریکړې شوې وي او د هغوی د ترسره کولو لپاره مشخصي کمېټې ټاکل شوې وي، بحث او د اندونو تبادله وشوه او ټاکل شوو کمېټو د خپلو اجراآتو د پرمختګ د وضعیت په هکله معلومات وړاندې کړل.
همدارنګه د ناستې په بهیر کې،د برېښنا انرژي د تولید او لېږد د یو شمېر پروژو په هکله هم خبرې اترې وشوې، چې له پانګوالو سره د لا زیاتې همغږي او د انرژي سکتور د ستونزو د هوارولو په موخه اړین تصمیمونه ونیول شول.
د دفتر عمومي رئيس د رئيسانو او تخنیکي مسؤلینو د اندونو تر اورېدو وروسته، د چارو د لا غوره ترسره کولو په موخه اړینې لارښوونې او سپارښتنې وکړې
