د اوبو او انرژي سرپرست وزیر د اختر مبارکي په ناستو کې په خدمت کولو کې په اخلاص او لا زیاتو هڅو ټینګار وکړ
د اوبو او انرژي سرپرست وزیر محترم الحاج ملا عبدالطیف منصور د دغهٔ وزارت له مسؤولینو، رئیسانو او کارکوونکو سره د اختر مبارکي په لیدنو کې د کوچني اختر د مبارکي تر څنګ د هېواد او خلکو د خدمت کولو په لاره کې د اخلاص، مسؤولیت منلو او لا ډېرو هڅو باندې ټینګار وکړ.
د اوبو او انرژي سرپرست وزیر په دغو ناستو کې، د انسان د خلقت موخه د څښتن تعالی بنده ګي او پېژندنه وبلله او د روژې مبارکې میاشتې فضیلتونو ته په اشارې سره یې د خدای (ج) له لوی دربار څخه د نړۍ د مسلمانانو د طاعاتو او عباداتو قبولي وغوښتله.
ښاغلي منصور، په هېواد کې هر اړخیز امنیت او د اسلامي نظام استقرار د الله (ج) یو لوی نعمت وباله او یادونه یې وکړه چې د افغانستان په ټولو خلکو لازمه ده تر څو د الله (ج) د دغو نعمتونو د شکر ادا کولو لپاره د نظام د ټینګښت او د هېواد د آبادولو په لاره کې په یووالي او ورورولۍ سره هڅې وکړي.
هغه په دوام کې د اوبو او انرژي وزارت کارکوونکو ته په خطاب سره، د دندو په ترسره کولو کې په مسئولیت منلو، ژمنتیا او اخلاص باندې ټینګار وکړ او له هغوئ څخه یې وغوښتل تر څو د خلکو د خدمت او د هېواد د پرمختګ په لاره کې شپه او ورځ په خپل ټول ځواک سره هڅې وکړي.
د یادولو وړ ده چې دغه لیدنې په بشپړه توګه د ورورولۍ او دوستۍ په فضا کې ترسره شوې او د خیر په دعا سره پای ته ورسېدلې.
