د اوبو او انرژي سرپرست وزیر د ترکیې هېواد له ګڼ شمېر سوداګرو سره د اوبو او انرژي په پروژو کې د پانګونې په هکله خبرې، اترې وکړې
د اوبو او انرژي سرپرست وزیر محترم الحاج ملا عبداللطیف منصور د ترکیې هېواد د سوداګرو له پلاوي سره چې « د ترکیې د کار موندنې او سوداګري اخلاق ټولنې» تر سرلیک لاندې فعالیت لري وکتل او د اوبو او انرژي په پروژو کې د پانګونې په هکله خبرې، اترې وکړې.
په دغه لیدنه کې، د اوبو او انرژي سرپرست وزیر هغوی ته ډاډ ورکړ، چې په افغانستان کې د بېلابېلو سرچینو څخه د انرژي د تولید لپاره پوره وړتیا شتون لري او اوسمهال په افغانستان کې له هره پلوه د پانګونې لپاره زمینه چمتو ده.
ښاغلي منصور ټینګار وکړ، چې دغه وزارت د اوبو او انرژي په برخه کې د پانګونې هرکلی کوي او له پانګوالو سره به همکار و اوسي.
په ورته مهال، د ترکي سوداګرو یوه غړي افغانستان ته د خپل راتګ موخه له دغه هېواد سره د سوداګري اړیکو پراختیا وبلله او د اوبو او انرژي په سکتورونو کې د پانګونې لپاره یې خپله لېوالتیا څرګنده کړه.
