د اوبو او انرژي سرپرست وزیر په یوه لویه ولسي غونډه کې ګډون وکړ.
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف "منصور" تېره ورځ په پکتیا ولایت کې په هغه لویه ولسي غونډه کې ګډون وکړ چې ګڼ شمېر قومي مخورو، جهادي شخصیتونو او ځوانانو په کې برخه اخیستې وه.
په یاده غونډه کې دغو خلکو د افغانستان د اسلامي امارت څخه د خپل هراړخیز ملاتړ څرګندولو تر څنګ په هیواد کې د ډاډمن امنیت او روانو پرمختیایي چارو ستاینه وکړه او د اوبو او انرژي سرپرست څخه یې د لا زیاتو ودانیزو پروژو د پیل غوښتنه وکړه.
د اوبو او انرژي سرپرست وزیر په خپل وار سره د اشغالګرو په وړاندې له مجاهدینو سره د دوی د هر اړخیزو مرستو او قربانیو ستاینه وکړه او ډاډ یې ورکړ چې د اوبو او انرژي وزارت به د شته امکاناتو او متوازن انکشاف په چوکاټ کې د اوبو او برېښنا په برخه کې په دغه ولایت کې لا زیاتې پروژې پیل کړي.
غونډه د ګران هیواد د ابادي او سمسورتیا په دعا سره پای ته ورسېده.
