د اوبو او انرژي سرپرست وزیر پکتیا ولایت ته سفر وکړ.
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف "منصور" تېره ورځ د یوه کاري سفر په بهیر کې د پکتیا ولایت د زرمت ولسوالي ته ولاړ. نوموړي د دغه سفر په ترڅ کې په هغه غونډه کې ګډون وکړ چې د یادې ولسوالي ولسوال، د ولسوالي نور کارمندان ،ډلګۍ مشران او قومي مشران یې ګډون وال وو.
محترم وزیر صاحب او د غونډې ګډون والو په دغه ناسته کې د یادې ولسوالي د خلکو ستونزې په تېره بیا هغه قومي تړونونه چې پخوا شوي وو ،وڅېړل او ټینګار یې وکړ چې یاد تړونونه باید په بشپړ ډول عملي شي، دغه راز وزیر صاحب د یادې ولسوالي منسوبینو او قومي مشرانو ته د اسلامي امارت د تګلارو په هکله مفصل معلومات وړاندې کړل او ډاډ یې ورکړ چې د دغې ولسوالي د خلکو د ستونزو د حل په موخه به له خپل ټول توان او صلاحیت څخه کار اخلي او د خپلو خلکو د خدمت په لاره کې به هیڅکله د ستړیا احساس ونکړي.
د غونډې ټولو ګډونوالو د محترم وزیر صاحب له راتګ او څرګندونو څخه خوښي وښوده او ژمنه یې وکړه چې دوی به هم د خپلې ولسوالي د خلکو د ستونزو د حل په موخه خپلې همکاري او هلو ځلو ته دوام ورکړي. غونډه د ګران هېواد د ابادي او سمسورتیا په دعا سره پای ته ورسېده.
