د اوبو او انرژي وزارت او د 77 ترکي شرکت تخنیکي ټیمونو د لومړي او دویم سروبي د برېښنا بند له ساحو څخه لیدنه وکړه
د اوبو او انرژي وزارت د انرژي معینیت او د ۷۷ ترکي ودانیز شرکت تخنیکي ټیمونو د لومړي او دویم سروبي د برېښنا بند له ساحو څخه د مخکیني هوکړه لیک پر بنسټ چې ددې وزارت او د یاد شرکت ترمنځ لاسلیک شوی وو، لیدنه وکړه.
د یادو ساحو څخه د لیدنې پرمهال، د اوبو او انرژي وزارت د انرژي برنامو رئیس انجنیر فرهاد محمودي او ورسره مل د انرژي معینیت تخنیکي ټیم، د ۷۷ ترکي شرکت استازی ښاغلی بوراک اونسال او ورسره مل تخنیکي ټیم، د یادې پروژې د چارو د پیل په موخه خپلې ارزونې ترسره کړې.
د هغه هوکړه لیک پر بنسټ چې د اوبو او انرژي وزارت او د ترکیې هېواد د ۷۷ ودانیز شرکت ترمنځ لاسلیک شوی وو، یاد شرکت خپلې څېړنې بشپړې او د اوبو او انرژي وزارت ته یې سپارلي دي چې د تخنیکي او اقتصادي څېړنو د وروستي کولو لپاره یې کار جریان لري.
