د اوبو او انرژي وزارت او لوړو زده کړو وزارت ترمنځ د همکاري هوکړه ليک لاسليک شو
د اوبو او انرژي سرپرست وزير محترم ملا عبداللطيف منصور د لوړو زده کړو وزارت سرپرست وزير محترم شيخ ندا محمد نديم سره د دواړو وزارتونو ترمنځ د علمي او تخنيکي ګډ هوکړه ليک لاسليک کړ.
د نوموړي برنامې په پيل کې د لوړو زده کړو وزارت علمي معين محترم دوکتور لطف الله خيرخواه د ادارو ترمنځ د علمي او کاري اړيکو اهميت ته په اشارې سره ، د ياد هوکړه ليک لاسليکول د دواړو وزارتونو ترمنځ د ګډو همکاريو او همغږيو په برخه کې ارزښتناک وبالهٔ.
همدارنګه د اوبو او انرژي سرپرست وزير محترم ملا عبداللطيف منصور د نوموړي هوکړه ليک لاسليکول د دواړووزارتونو ترمنځ د علمي او تخنيکي تجاربو په برخه کې ګډه همکاري وبلله او ټينګار يې وکړ چې اوس هغه مهال را رسېدلى چې په ګډې همکاري سره د هېواد د آبادۍ په لار کې له ټولو علمي او مسلکي ظرفيتونو څخه په غوره توګه ګټه واخيستل شي.
په ورته مهال، د لوړو زده کړو وزارت سرپرست وزير ښاغلي نديم هم د نوموړي هوکړه ليک لاسليکول د دواړو وزارتونو ترمنځ د همکاري او همغږۍ په برخه کې اړين او اغېزمن وباله او د دواړو وزارتونو ترمنځ يې د علمي، تخنيکي، څېړنيزو او مسلکي تجاربو د شريکولو په برخه کې د همکاري ژمنه وکړه.
د يادونې وړ ده، چې ياد هوکړه ليک د دوو اړخيزو اړيکو د ټينګولو، د علمي او تخنيکي تجاربو د شريکولو، د علمي څېړنو د بهير د آسانتياوو، د کار آموزي فرصتونو د برابرولو، د وړتيا لوړولو برنامو د رامنځته کولو او د دواړووزارتونو ترمنځ د نورو ګډو علمي او تخنيکي همکاريو په موخه لاسليک شوى دى.
