د اوبو او انرژي وزارت د انرژي معین د دغه وزارت رئيسانو، سلاکارانو او کارمندانو ته ور وپېژندل شو
د اوبو او انرژي سرپرست وزیر محترم الحاج ملا عبداللطیف منصور د اميرالمؤمنين حفظهالله تعالی د حکم پر بنسټ د دغه وزارت د انرژي معین محترم ملا عبدالهادي یعقوب یې د دغه وزارت رئيسانو، سلاکارانو او کارمندانو ته ور وپېژاند.
د اوبو او انرژي سرپرست وزیر د دغه وزارت د انرژي معین په پېژاند غونډه کې د انرژي سکتور د ارزښت په هکله په هر اړخیزه توګه خبرې وکړې او ټینګار یې وکړ، چې اوسمهال د انرژي د سکتور پراختیا ته په هېواد کې تر ټولو اړینه او بنسټیزه اړتیا ده.
ښاغلي منصور په دغه غونډه کې یادونه وکړه، چې که څه هم په دې وروستیو کې د دغه وزارت له لوري د انرژي د پراختیا په برخه کې ښې کړنې ترسره شوې، خو په هېواد کې د انرژي سکتور حیاتي ارزښت ته په کتو سره اړتیا ده، چې د دغه سکتور پر پراختیا باندې لا زیات کار وشي.
په ورته مهال، د اطلاعاتو او کلتور وزارت د ځوانانو د چارو رئيس محترم مولوي امدالله منصور د افغانستان د اسلامي امارت په بېلابېلو برخو کې د انرژي د نوي معین کړنې وستایلې.
همدغه راز، د اوبو او انرژي وزارت د دفتر عمومي رئيس محترم قاري محمد عبدالعزیز عزیز د اميرالمؤمنين حفظهالله تعالی حکم د نوموړي په هکله د دغه وزارت د انرژي د معین په توګه د رئيسانو، سلاکارانو او کارمندانو په شتون کې ولوست او هغه ته یې په هېواد کې د انرژي سکتور د پراختیا په برخه کې د مسؤلیتونو په ترسره کولو کې د بریالیتوب غوښتنه وکړه.
د یادونې وړ ده، چې محترم ملا عبدالهادي یعقوب د اسلامي امارت په بېلابېلو برخو کې د پام وړ کړنې ترسره کړې او تر دې مخکې یې د کندهار ولایت د ټولګټو د رئيس په توګه دنده ترسره کوله او اوس د عالیقدر امیرالمؤمنین حفظه الله تعالی د حکم پر بنسټ د اوبو او انرژي وزارت د انرژي د معین په توګه ټاکل شوی دی.
