د اوبو او انرژي وزارت د انرژي معین د یو پلاوي په مشري کاپیسا ولایت ته د باغدرې برېښنا بند ساحې د لېدلو په موخه سفر وکړ
د اوبو او انرژي وزارت د انرژي معین محترم مولوي حمدالله زاهد د یوه پلاوي په مشري چې پکې د دغه وزارت تخنیکي مسؤلینو، د کانونو او پټرولیم وزارت استازي او د MCC چینایي شرکت رئيس ښاغلي سونګ ون بین او د دغه شرکت تخنیکي مسؤلینو شتون درلود، کاپیسا ولایت ته د باغدرې برېښنا بند د تخنیکي، اقتصادي او ټولنیزې ارزونې په موخه سفر وکړ.
د انرژي محترم معین او ور سره مل پلاوي او د کاپیسا سیندیزې فرعي حوزې رئيس محترم انجنیر کاوه خروش د باغدرې برېښنا بند د ساحې له بېلابېلو برخو څخه لیدنه وکړه او اړوندو مسؤلینو ته یې اړینې سپارښتنې وکړې.
په ورته مهال، د دغه وزارت د انرژي معین او ورسره مل تخنیکي پلاوي کاپیسا ولایت ته د خپل سفر په لړ کې د کاپیسا له والي محترم قاري بریال او مرستیال یې محترم شیخ اسدالله سنان سره وکتل او د نوموړي بند په هکله یې بحث او د اندونو تبادله وکړه.
همدغه راز، د انرژي محترم معین د کاپیسا سیندیزې فرعي حوزې له رئيس محترم انجنیر کاوه خروش او د دغه ریاست له کارمندانو سره وکتل او د دوی ستونزې او وړاندیزونه یې واورېدل.
د یادونې وړ ده، چې د باغدرې برېښنا بند د چارو پیل د اوبو او انرژي وزارت په لومړیتوبونو کې ده او په جوړېدو سره به یې ۲۴۰ میګاواټه برېښنا تولید او ۲۰۵ میلیون متره مکعب اوبه ذخیره شي.
