د اوبو او انرژي وزارت د انرژي معین همکارانو ته ور وپېژندل شو او په دغه معینیت کې یې رسما خپله دنده پیل کړه
محترم مولوي حمدالله زاهد چې تر دې مخکې یې په مالیې وزارت کې د اداري معین په توګه دنده ترسره کوله، د عالیقدر امیرالمؤمنین حفظه الله د حکم پر بنسټ د اوبو او انرژي وزارت د انرژي معین په توګه ټاکل شوی او په یوې ناستې کې د اوبو او انرژي سرپرست وزیر محترم الحاج ملا عبداللطیف منصور له لوري همکارانو ته ور وپېژندل شو.
د اوبو او انرژي سرپرست وزیر د انرژي معین د ور پېژندلو پر مهال د دغه سکتور ارزښت ته په اشارې سره یادونه وکړه، چې په هېواد کې د انرژي سکتور د پراختیا لپاره ډېرې هڅې ترسره شوې او له نیکه مرغه د دغو هڅو له کبله د نوموړي معینیت چارې سمبال شوې او د برېښنا انرژي د تولید او پراختیا لپاره هم ارزښتناکې کړنې ترسره شوې دي.
ښاغلي منصور زیاته کړه، تمه ده چې له دې وروسته د معین صاحب په شتون کې چې یو رښتینی، وړ او با اخلاص کس دی، د انرژي سکتور د پراختیا په برخه کې لا اغېزمن ګامونه پورته شي.
په ورته مهال، د چارو ادارې عمومي ریاست مالي او اداري مرستیال محترم مولوي محمد صابر معتصم باالله د عالیقدر امیرالمؤمنین حفظه الله د حکم د لوستلو ترڅنګ، د افغانستان د اسلامي امارت په اډانه کې د انرژي د نوي معین کړنې وستایلې او هغوی ته یې د افغانستان د خلکو لپاره د خدمت ترسره کولو په برخه کې د لا زیاتو توفیقاتو غوښتنه وکړه.
همدغه راز، د اوبو او انرژي وزارت د انرژي نوی معین محترم مولوي حمدالله زاهد هم په دغه ناسته کې وویل، چې مقام او دنده یو ویاړ نه بلکې یو دروند مسؤلیت دی، چې مونږ د هغه په واسطه آزمایل کېږو. هغه ټینګار وکړ، چې اوسمهال مونږ ټول په الهي آزموینه کې یو، او په دغه ډګر کې له یوې خوا د خدای(ج) په وړاندې مسؤل یو او له بلې خوا د افغانستان ملت هم پر مونږ باندې حق لري چې هغوی ته په رښتینې توګه خدمت وکړو.
غونډه د پایدارې انرژي د عمومي رئيس محترم مولوي عزیزالله سهار له خوا په دعا سره پای ته ورسېده.
