د اوبو او انرژي وزارت د اوبو معین د ترکيې هېواد د (IWWAA) خیریه بنسټ له استازي سره وکتل
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده نن له غرمې وروسته د خپل کار په دفتر کې د ترکیې هېواد د ( IWWAA) خیریه بنسټ له استازي ښاغلي انجنیر شهباز سره وکتل او په افغانستان کې د څښاک اوبو د ژورو څاه ګانو د کیندلو او د اوبو رسولو شبکو د جوړولو په هکله باندې بحث او د نظر تبادله وکړه.
په یاده لیدنه کې، د یاد خیریه بنسټ استازي د هېواد په بېلابېلو ولایتونو کې د څښاک اوبو د ژورو څاه ګانو د کیندولو او د اوبو رسولو شبکو د جوړولو کې یې خپل چمتو والی څرګند کړ.
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده په دې لیدنه کې وویل چې مونږ ټولو کورنیو او بهرنیو خیریه بنسټونو ته چې په هېواد کې د لویو، منځنیو،کوچنیو بندونو د جوړولو، د څښاک اوبو د ژورو څاه ګانو د کیندلو او د اوبو رسولو شبکو جوړولو ته لېواله دي، د دې پروژو د پلي کیدو لپاره زمینه چمتو کو او په دې برخه کې هر راز همکاري ته تیار یوو.
