د اوبو او انرژي وزارت د اوبو معین د لوګر ولایت له یو شمېر قومي مشرانو سره په هغه ولایت کې د خروار بند پروژې په هکله خبرې وکړې
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د لوګر ولایت د خروار ولسوالي له یو شمېر قومي مشرانو سره وکتل او د هغه ولایت د پروژو په ځانګړې توګه د خروار ولسوالي د خروار بند پروژې او د یوې هدیرې د ورانېدو د مخنیوي په موخه د یوه استنادي دېوال د جوړېدو په هکله یې بحث او د اندونو تبادله وکړه.
د نوموړې ولسوالي قومي مشرانو د دغه وزارت د اوبو له محترم معین سره په لیدنه کې د خروار د اوبو ذخیروي بند د حریم ټاکلو او د یوې هدیرې د ورانېدو دمخنیوي لپاره د یوه استنادي دېوال د جوړېدو غوښتنه وکړه.
د اوبو محترم معین د لوګر ولایت قومي مشرانو ته ډاډ ورکړ، چې د خروار بند د حریم ټاکلو او د یوې هدیرې د ورانېدو دمخنیوي په موخه د استنادي دېوال جوړول به په پلان کې شامل او ان شاءالله په راتلونکي کې به یې چارې پيل شي.
