د اوبو او انرژي وزارت د حاضري او پذیرش الکترونیکي سیسټم پرانیستل شو
د یاد سیسټم پرانیست غونډه د اوبو او انرژي سرپرست وزیر الحاج ملا عبداللطیف منصور، د اوبو او انرژي وزارت د دفتر عمومي رئیس قاري محمد عبدالعزیز عزیز، د مالي او اداري عمومي رئیس الحاج محمدالدین نیازي، د معلوماتي ټکنالوژي رئیس انجنیر حبیب الرحمن جلالزي او د یاد وزارت د یو شمیر نورو رئیسانو او کارمندانو په ګډون ترسره شوه.
په یاده غونډه کې د اوبو او انرژي سرپرست وزیر الحاج ملا عبداللطیف منصور د الکترونیکی سیسټمونو په جوړولو کې د معلوماتي ټکنالوژي ریاست د هڅو ستاینه وکړه او ویې ویل چې ددې وزارت رهبري د اسانتیاوو او امکاناتو په برابرولو سره د الکترونیکي سیسټمونو په جوړولو کې ددې وزارت د انجنیرانو له هڅو څخه ملاتړ کوي.
د غونډې په دوام کې، د معلوماتي ټکنالوژي ریاست رئیس انجنیر حبیب الرحمن جلالزي د حاضري او پذیرش سیسټم جوړولو ته په اشاري سره وویل چې یاد ریاست هڅه کوي ترڅو د نویو الکترونیکي سیسټمونو په جوړولو سره ددې وزارت د چارو په پرمخ وړلو کې لا زیاتې اسانتیاوي رامنځته کړي.
د یادې غونډې په پای کې، نوی جوړ شوی د حاضري او پذیرش سیسټم د انجنیر زیارت میر صدیقي له لوري د یوه پرزنټیشن په ترڅ کې ګډونوالو ته وړاندې شو.
د یادونې وړ ده، چې یاد سیسټم د اوبو او انرژي وزارت د کارمندانو په مالي، اداري او حاضري چارو کې د لازیاتو اسانتیاوو د رامنځته کولو په موخه جوړ شوی دی.
