د اوبو او انرژي وزارت د رهبرۍ غونډه ترسره شوه
دغه ناسته د اوبو او انرژي سرپرست وزیر محترم الحاج ملا عبداللطیف منصور تر رهبرۍ لاندې د دغه وزارت د اوبو معین محترم مجیب الرحمن عمر آخندزاده، د انرژي معین محترم الحاج ملا عبدالهادي یعقوب، د اوبو او انرژي سکټورونو د عمومي رئيسانو او یو شمېر نورو مسؤلینو په شتون کې ترسره شوه.
په دغه ناسته کې، د اوبو او انرژي بېلابېلو اداري او تخنیکي پروژو په ځانګړې توګه د اوبو څلورو سترو بندونو لکه په بغلان ولایت کې د کېله ګي بند، په غزني ولایت کې د زردالو بند، په هرات ولایت کې د کادانک بند او په تخار ولایت کې د کښته کوکچې بند په هکله بحث او د اندونو تبادله وشوه.
د اوبو او انرژي سرپرست وزیر د ناستې په بهیر کې د پروژو پر کره څارنې باندې ټینګار وکړ او اړوندو مسؤلینو ته یې سپارښتنه وکړه، چې د پروژو د پلي کولو پر مهال دې ټول تخنیکي معیارونه په پوره پاملرنې سره په پام کې ونیسي.
ښاغلي منصور اړوندو مسؤلینو ته د چارو د چټکتیا، لا زیات غورهوالي او تنظیم په هکله اړینې سپارښتنې وکړې.
