د اوبو او انرژي وزارت د کورنۍ پلټنې نوی رئيس همکارانو ته ور وپېژندل شو
محترم مولوي فضل الرحمن " سعید" د اوبو او انرژي وزارت د رهبري مقام د وړاندیز او د افغانستان د اسلامي امارت د ریاست الوزرا محترم مقام د منظوري پر بنسټ د اوبو او انرژي وزارت د کورنۍ پلټنې د رئيس په توګه ټاکل شوی او په یوه ناسته کې د لوی څارنوالي د فرامینو د پلي کېدو او د څارنې عمومي ریاست د معین محترم شیخ نورالله نوري، د اوبو او انرژي وزارت د دفتر د عمومي رئيس محترم قاري محمد عبدالعزیز عزیز، د مالي او اداري عمومي رئيس محترم الحاج محمد الدین نیازي او د دغه وزارت د یو شمېر نورو رئيسانو په شتون کې همکارانو ته ور وپېژندل شو.
ښاغلي نوري د پيژندګلوي په دغه ناسته کې وویل چې ټول مسؤلین په خپلو دندو کې د خدای(ج) په آزموینه کې دي او هر څوک باید تل د خپل مسؤلیت په تناسب هڅه وکړي چې په دغه الهي آزموینه کې بریالی شي.
په ورته مهال، د اوبو او انرژي وزارت د دفتر عمومي رئيس هم په اسلامي امارت کې د ښاغلي مولوي سعید د پخوانيو خدمتونو ستاینه وکړه او د کورنۍ پلټنې له ټولو کارمندانو څخه یې و غوښتل چې له نوي رئيس سره د چارو په پرمخ وړلو کې په ښه توګه او نېکو مشورو سره همکاري وکړي.
همدغه راز، د پایدارې انرژي عمومي رئيس او د کورنۍ پلټنې پخواني رئيس محترم مولوي عزیزالله "سهار" هم په اسلامي امارت کې د مولوي فضل الرحمن نیکو او ارزښتناکو خدمتونو ته اشاره وکړه او ورته یې په دغه مهم مسؤلیت کې د بریا غوښتنه وکړه.
د یادونې وړ ده، چې محترم مولوي فضل الرحمن"سعید" له منبع العلوم مدرسې څخه د لیسانس په کچه فارغ شوی او د اسلامي امارت په مخکیني حاکمیت کې په مرکزي احصائيې کې د دموګرافي د رئيس په توګه دنده ترسره کړې ده.
ښاغلي سعید د یرغل په وړاندې په جهادي پړاو کې درې ځله د بګرام په بند خونه کې بندي شوی او د پکتیا ولایت د زرمت ولسوالي د نظامي کمېسیون د مسؤل په توګه دنده ترسره کړې، چې په دې لاره کې کوټلي ګامونه پورته کړي او ډېرې ستونزې ګاللي دي.
