د اوبو او انرژي وزارت سرپرست د ترینکوټ سیندیزې فرعي حوزې له رئیس سره وکتل
د اوبو او انرژي وزارت سرپرست محترم الحاج ملا عبداللطیف منصور د ترینکوټ سیندیزې فرعي حوزې له رئیس محترم الحاج ملا وکیل احمد نقي سره وکتل او په ارزګان ولایت کې د آغاجان او شفلوغ بندونو د چارو د څرنګوالي پرمخ وړلو په هکله یې بحث او د اندونو تبادله وکړه.
د اوبو او انرژي وزارت سرپرست محترم الحاج ملا عبداللطیف منصور وویل، چې د آغاجان بند د جوړولو چارې د افغانستان اسلامي امارت د اقتصادي کمیسیون له لوري ملي پراختیا شرکت ته سپارل شوې دي او همدارنګه د شفلوغ بند د ډیزاین او جیو تخنیک چارې هم پای ته رسیدلې دي.
په دغه لیدنه کې د ترینکوټ سیندیزې فرعي حوزې رئیس د نوموړي ریاست اړوند ستونزې او وړاندیزونه د اوبو او انرژي وزارت له سرپرست وزیر سره شریکې کړې.
همدارنګه، د یادې لیدنې په پای کې د اوبو او انرژي وزارت سرپرست وزیر محترم الحاج ملا عبداللطیف منصور له لوري د ترینکوټ سیندیزې فرعي حوزې رئیس محترم الحاج ملا وکیل احمد نقي ته جهادي ستاینلیک هم ورکړل شو.
د یادونې وړ ده، چې په دې لیدنه کې په ارزګان ولایت کې د سرآب او مني غار بندونو د تخنیکي سروې په موخه هم اړوندو مسئولینو ته اړینې سپارښتنې وشوې.
