د اوبو او انرژي وزارت سرپرست وزیر د جوزجان ولایت له یو شمېر مشرانو سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې د جوزجان ولایت د سیندیزې فرعي حوزې له رئيس ښاغلي ملا سعدالدین سلیمي او دهغه ولایت له یو شمېر مشرانو سره وکتل.
په دغه لیدنه کې، د جوزجان ولایت د سیندیزې فرعي حوزې رئیس د ۱۴۰۰ لمریز کال د شپږو وروستیو میاشتو کاري راپور د اوبو او انرژي وزارت د سرپرست وزیر سره شریک کړ.
همدارنګه د جوزجان ولایت د قرقین او خماب ولسوالیو یو شمېر مشرانو د اوبو او انرژي وزارت سرپرست ښاغلي منصور ته د خپلو ستونزو او اړتیاوو په اړه خبرې وکړې او خپل وړاندیزونه یې وړاندې کړل او په یادو ولسوالیو کې د برېښنا رسولو د پروژو د تطبیق غوښتنه یې وکړه.
د اوبو او انرژي وزارت سرپرست ښاغلي ملا عبداللطیف منصور د جوزجان ولایت مشرانو ته ډاډ ورکړ چې د جوزجان ولایت د خلکو ستونزو ته به رسیدګي و کړي او د قرقین او خماب ولسوالیو د برېښنا رسولو پروژې ته به لازمه پاملرنه وکړې.
