د اوبو او انرژي وزارت سرپرست وزیر د لوګر ولایت د څرخ له ولسوال او مشرانو سره وکتل
د اوبو او انرژي وزارت سرپرست وزیر محترم ملا عبداللطیف منصور د لوګر ولایت د څرخ له ولسوال محترم مولوي رفیع الله "محمد عبدالله" او د یادې ولسوالي له مشرانو سره وکتل او د اوبو او انرژي په برخه کې د هغه ولایت د خلکو د ستونزو په هکله یې بحث او خبرې اترې وکړې.
په یاده لیدنه کې د لوګر ولایت د څرخ ولسوالي مشرانو خپلې ستونزې او وړاندیزونه د اوبو او انرژي وزارت له سرپرست وزیر سره شریک کړل او د اوبو او انرژي پروژو د پلې کېدو په ځانګړې توګه د یادې ولسوالي په مرکز کې د برېښنا سب سټیشن د جوړولو غوښتنه یې وکړه.
د اوبو او انرژي وزار سرپرست وزیر د څرخ ولسوال او مشرانو ته ډاډ ورکړ چې یادې ولسوالي ته به د پروژې د سروې په موخه تخنیکي پلاوی ولېږل شي او د شته امکاناتو په پام کې نیولو سره به د دوی ستونزو ته رسیدګي وشي.
