د اوبو او انرژي وزارت سرپرست وزیر د هرات، غور او بادغیس ولایتونو له والیانو سره وکتل
د اوبو او انرژي وزارت سرپرست وزیر محترم ملا عبداللطیف منصور د خپل کار په دفتر کې د هرات والي محترم شیخ الحدیث مولانا نوراحمد اسلام جار، د غور والي محترم مولوي احمد شاه دین دوست او د بادغیس والي محترم مولوي عبدالصمد جاوید سره وکتل.
په یاده لیدنه کې، د هرات، غور او بادغیس ولایتونو والیانو د یادو ولایتونو د خلکو ستونزې د اوبو او انرژي وزارت د رهبري مقام سره شریکې کړې او په نوموړو ولایتونو کې یې د اوبو او انرژي پروژو دپلې کولو غوښتنه وکړه.
د اوبو او انرژي وزارت سرپرست وزیر په دې لیدنه کې د نوموړو ولایتونو والیانو ته ډاډ ورکړ چې د اوبو او انرژي وزارت رهبري هڅه کوي، چې د شته امکاناتو په پام کې نیولو سره د یادو ولایتونو د اوبو او برېښنا ستونزو ته رسیدګي وشي.
همدارنګه هغه په دې لیدنه کې په هرات ولایت کې له بادي سرچینو څخه د ۲۰۰ میګاواټه برېښنا د تولید پروژې د چارو د پيل په هکله خبر ې وکړې او همدارنګه یې یادونه وکړه چې د ټاپ د برېښنا مزي د لېږد د پروژې د پلې کولو په برخه کې به هم د ترکمنستان هېواد له پلاوي سره خبرې وکړي، تر څو چارې یې په راتلونکي کې پیل شي.
