د اوبو او انرژي وزارت سرپرست وزیر د پکتیکا مرستیال والي او د هغه ولایت د سیندیزې فرعي حوزې له رئيس سره وکتل
د اوبو او انرژي وزارت سرپرست وزیر محترم ملا عبداللطیف منصور د خپل کار په دفتر کې د پکتیکا مرستیال والي محترم مخدوم عبدالسلام سعادت او د هغه ولایت د سیندیزې فرعي حوزې رئيس محترم قاري فتح محمد ذاکر سره وکتل.
په یاده لیدنه کې د بېلابېلو موضوعاتو په ځانګړې توګه د پکتیکا ولایت د خلکو د ستونزو د هوارولو او په نوموړي ولایت کې د اوبو او انرژي پروژو د پلې کولو په هکله بحث او د اندونو تبادله وشوه.
د اوبو او انرژي وزارت سرپرست وزیر د پکتیکا ولایت مرستیال والي ته د اوبو او انرژي پروژو د پلې کولو په برخه کې ډاډ ورکړ او یادونه یې وکړه، چې د پلتوني بند د عملي چارو د پیل لپاره چمتووالی جریان لري.
ښاغلي منصور په خپلو خبرو کې د پکتیکا مرستیال والي ته وویل، چې د اوبو د مدیریت او تنظیم د پروژو د پلې کولو په برخه کې به هم د شته امکاناتو په چوکاټ کې د دې ولایت د خلکو ستونزو د حل لپاره اړینه پاملرنه وشي.
