د اوبو او انرژي وزارت کې د شهید الحاج خلیل الرحمن حقاني د فاتحې مراسم ترسره شول
د اوبو او انرژې وزارت په جومات کې د مهاجرینو او بېرته را ستنېدونکو چارو وزارت وزیر شهید الحاج خلیل الرحمن حقاني د فاتحې مراسم په داسې حال کې ترسره شول چې د اوبو او انرژي سرپرست وزیر محترم الحاج ملا عبداللطیف منصور، د انرژي معین محترم ملا عبدالهادي یعقوب، د اوبو او انرژي وزارت ستر سلاکار ډاکټر فاروق اعظم او ددغه وزارت ګڼ شمېر رئیسانو او کارمندانو پکې ګډون کړی و.
د اوبو او انرژي سرپرست وزیر محترم الحاج ملا عبداللطیف منصور په دغو مراسمو کې د شهید الحاج خلیل الرحمن حقاني د جهادي دورې د خاطراتو په یادولو سره زیاته کړه چې نوموړي د ځواني ټول عمر په سنګر کې تېر کړی او د روسي او امریکایي اشغال په وړاندې یې نه هېرېدونکي جهادي عملیاتونه ترسره کړي دي.
ښاغلي منصور همدارنګه زیاته کړه چې الحمدالله اوس شرعي نظام په ټول افغانستان کې حاکم دی او موږ باید د اسلامي نظام له فرامینو څخه پوره اطاعت وکړو، د بیت المال ساتنه پر ځان لازمي وګڼو او د وطن د آبادۍ لپاره په ګډه سره کار وکړو.
همدارنګه د اوبو او انرژي وزارت ستر سلاکار د شهید حقاني صاحب د جهادي خاطراتو د یادولو سربېره زیاته کړه چې د جهاد قافله به تر قیامته پورې دوام ولري او دشمن هېڅکله زموږ اسلامي عقیدې نشي کمزورې کولی او د افغانانو د اوسنیو ستونزو لپاره حوصله او تقوا پکار ده.
