د اوبو معینیت اونیزه تخنیکي ناسته ترسره شوه
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر رهبري لاندې د اوبو سکتور د رئیسانو، سلاکارانو او یو شمېر تخنیکي مسؤلینو په شتون کې ترسره شوه.
په دغه ناسته کې، د اوبو پراختیایي پروژو اړوند د بېلابېلو موضوعاتو لکه: په کابل ښار کې د ځمکې لاندې اوبو سرچینو کموالي د ننګونې او د دغې ستونزې د هوارولو په موخه د اړینو حل لارو چارو، د مس عینک کان له قراردادي شرکت سره د نوموړي کان د را ایستلو د پروسې لپاره د اوبو د چمتوکولو، د کیله ګي او کوزې کوکچې بندونو د پرزنټیشنونو ارزولو او د څنډو د تحکیماتو پروژو تائيدي چې د اړوند ریاست له لوري یې نوی سروې او ډیزاین ترسره شوی، بحث او د اندونو تبادله وشوه.
د اوبو محترم معین د نوموړو موضوعاتو په هکله د رئیسانو د معلوماتو او راپورونو تر ارزولو وروسته، اړین تصمیمونه ونیول او اړوندو مسؤلیو ته یې د چارو د غوره ترسره کولو او چټکتیا په موخه اړینې سپارښتنې وکړې.
