د "ایران ترانسفو" شرکتونو د ټولګې مسؤلینو د اوبو او انرژي سرپرست وزیر سره په لیدنه کې په افغانستان کې د انرژي په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د "ایران ترانسفو" تر نامه لاندې د آلماني/ ایراني شرکتونو د یوې ټولګې له مسؤلینو سره وکتل.
په دغه لیدنه کې، د نوموړي شرکتونو د ټولګې مسؤلینو د خپلو کړنو په هکله معلومات وړاندې کړل او ویې ویل، لېواله دي چې په افغانستان کې د انرژي د تولید پروژو، د انرژي شبکو د پراختیا او د برېښنا شبکو د اړتیا وړ تجهیزاتو د چمتو کولو په برخه کې پانګونه وکړي.
د اوبو او انرژي سرپرست وزیر د نوموړو شرکتونو د ټولګې د لېوالتیا هرکلی وکړ او یادونه یې وکړه، چې غوره ده چې د دواړو لورو د تخنیکي مسؤلینو ترمنځ تخنیکي ناستې ترسره شي؛ ترڅو د پروژې د تشخیصولو، د پانګونې د څرنګوالي او نورو اړینو همغږیو په هکله هوکړې ته ورسي او تر هغه وروسته، وروستي کړنې د یو بل په توافق سره تر لاس لاندې ونیول شي.
