د بېلابېلو موضوعاتو د څېړلو په موخه د انرژي معینیت تخنیکي او اداري ناسته ترسره شوه
یاده ناسته د اوبو او انرژي وزارت د انرژي معین محترم ملا عبدالقاهر ادریس تر مشرې لاندې د یاد معینیت د رئيسانو او ټولو تخنیکي مسؤلینو په ګډون ترسره شوه.
په دې ناسته کې د څو اړینو تخنیکي او اداري موضوعاتو لکه: د انرژي سکتور د پنځه کلن پلان د پراختیا په موخه د جوړې شوې کمیټې د غړو د اندونو د څېړلو، د پلان د هر اړخیزولو او د چارو د چټکتیا، د وېش او په هېواد کې د انرژي د تولید د متوازن لېږد په هکله بحث او د اندونو تبادله ترسره شوه.
د اوبو او انرژي وزارت د انرژي معین محترم ملا عبدالقاهر ادریس د ناستې د غړو د اندونو تر اورېدلو وروسته، د هېواد د انرژي سکتور د پرځان بسیا کېدو په برخه کې د اغېزمنو هڅو په ترسره کولو باندې ټینګار وکړ او په دې برخه کې یې اړوندو مسؤلینو ته مشخصې دندې وسپارلې.
