د غزني ولایت د سردې بند د ساتنې او مراقبت پروژې چارې د 13400000 افغانیو په لګښت پیل شوې
د غزني ولایت د اندړو ولسوالي اړوند د سردې بند د ساتنې او مراقبت پروژې چارې د دیارلس میلیونه او څلور سوه زره(13400000) افغانیو په ارزښت د یاد ولایت د والي الحاج حافظ محمد امین جان عمري، د کابل سیندیزې حوزې عمومي رئیس انجینر حبیب الرحمن حقپال، د غزني سیندیزې فرعي حوزې د ولاړو اوبو رئیس مولوي محمد شفیق منصور عمر، د پکتیکا ولایت د ګومل سیندیزې فرعي حوزې رئیس قاري فتح محمد ذاکر او ګڼ شمیر سیمه ییزو مسئولینو او قومي مشرانو په شتون کې پیل شوې.
د نوموړې پروژې په پرانیست غونډه کې د کابل سیندیزې حوزې عمومي رئیس وویل، چې په غزني ولایت کې د سلطان، بهائي، باغچرې او د دهنه شير بندونو د ساتنې او مراقبت چارې جریان لري او د یاد ولایت په هرې ولسوالي کې به د اوبو د غوره مدیریت په موخه یو کوچنی ذخیروي بند هم جوړ شي. همدارنګه، هغه زیاته کړه، چې په غزني ولایت کې د اوبو د مدیریت په موخه به په روان کال کې د 96 میلیونه افغانیو په ارزښت یو شمیر کانالونه، سربندونه، کوچني بندونه او ټرينچونه هم جوړ شي.
د یادونې وړ ده، چې د غزني ولایت د سردې بند د 259 میلیونه متر مکعب اوبو د ذخیره کولو او د شاوخوا یو سلو پنځوس زره(150000) جریبه کرنیزې ځمکې د خړوبولو وړتیا لري، چې د ساتنې او مراقبت چارې یې د اوبو او انرژي وزارت په مالي ملاتړ د سپین دره ودانیز او سړک جوړونې شرکت له لوري پرمخ وړل کیږي.
