د پانګونې چارو د چټکتیا په موخه د ګلبهار انویست شرکت له مسئولینو سره د همغږۍ ناسته ترسره شوه
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې د ګلبهار انویست شرکت له مسئول ښاغلي حاجي ګلبهار حبیبي سره په داسې حال کې چې یو شمېر رئیسانو او تخنیکي مسئولینو هم شتون درلود، د ډبرو سکرو له سرچینو څخه د برېښنا د تولید په برخه کې د پانګونې چارو د چټکتیا په هکله بحث او د اندونو تبادله وکړه.
په یاده ناسته کې د اوبو او انرژي وزارت او د یاد شرکت تخنیکي مسئولینو د خپلو مطالعاتو د پرمختګ ګزارش او د څېړنو پایلې د اوبو او انرژي وزارت له رهبري مقام سره شریکې کړې.
د اوبو او انرژي وزارت سرپرست وزیر د تخنیکي مسئولینو د ګزارشونو تر اورېدو وروسته، د چارو د چټکتیا په موخه اړینې سپارښتنې وکړې او ټینګار یې وکړ چې د لا زیاتو همغږیو په موخه دې ژر تر ژره د اوبو او انرژي وزارت، د کانونو او پطرولیم وزارت او د یاد شرکت ترمنځ ګډه ناسته ترسره شې.
