د چینایي شرکتونو له یوې ډلې سره د انرژي په پروژو کې د پانګه اچونې په موخه ګډه ناسته ترسره شوه
د اوبو او انرژي وزارت سرپرست وزیر محترم ملا عبداللطیف منصور د خپل کار په دفتر کې په یوه ناسته کې د چینایي شرکتونو (HTC) د یوې ډلې له مسؤلینو سره د ډبرو سکرو له سرچینو او لمریزې برېښنا په پروژو کې د انرژي د تولید په موخه د پانګه اچونې په هکله بحث او د اندونو تبادله وکړه.
په یاده ناسته کې، د نوموړو شرکتونو د ګروپ مسؤلینو د انرژي د تولید په پروژو کې د پانګونې لپاره لېوالتیا څرګنده کړه او په دې برخه کې یې د اوبو او انرژي وزارت د رهبري مقام د همکاري غوښتنه وکړه.
د اوبو او انرژي وزارت سرپرست وزیر د هغوی د لېوالتیا ستاینه وکړه او یادونه یې وکړه چې اوسمهال په افغانستان کې له هره پلوه کاري فرصتونه چمتو شوي او د پانګونې لپاره هم زمینه برابره شوې ده.
ښاغلي منصور ټینګار وکړ چې د پانګونې د چارو د چټکتیا په موخه دې ډېر ژر څو اړخیز هوکړه لیک د دې وزارت، د یادو شرکتونو د ډلې او نورو اړوندو ادارو ترمنځ لاسلیک شي ترڅو د هغه سره سم، په عملي توګه ګډې همکارۍ پیل شي.
