د کندز ولایت په امام صاحب ولسوالي کې د اوبو میرانو سیستم د رسمي کولو په موخه ناسته ترسره شوه
یاده ناسته د پنج آمو سیندیزې حوزې عمومي رئیس الحاج مولوي عبدالحکیم حاجي حکمت، د کندز ولایت مقام د رئیس مولوي عبدالغفور شهیدزي، د امام صاحب ولسوالي ولسوال مولوي ګل محمد الیاس او یو شمیر نورو سیمه ییزو مسئولینو او کروندګرو په شتون کې ترسره شوه.
په دغه ناسته کې د پنج آمو سیندیزې حوزې عمومي رئیس د اوبو او انرژي وزارت د کړنلارې پر بنسټ د اوبو میرانو سیستم رسمي کول د اوبو شخړو د هوارولو په برخه کې یو موثر ګام وباله او له ټولو کروندګرو څخه یې وغوښتل، چې د ورورولۍ په فضا کې دې له یو بل سره همکاري وکړي.
