د ګازو له سرچینو څخه د برېښنا د تولید په هکله د همغږي څلور اړخیزه ناسته د اوبو او انرژي وزارت د انرژي په معینیت کې ترسره شوه
یاده ناسته د اوبو او انرژي وزارت د انرژي معین محترم ملا عبدالقاهر ادریس تر مشرې لاندې د کانونو او پټرولیم وزارت معین ښاغلي انجنیر وحیدالله حلیمي، د افغانستان برېښنا شرکت او سپین زر تولیدي شرکت د استازو په ګډون ترسره شوه.
په دې ناسته کې د ګازو له سرچینو څخه د برېښنا د تولید په پروژه کې د پانګونې د زمینې د چمتو کولو په هکله بحث او د اندونو تبادله وشوه.
د انرژي ښاغلي معین په یاده پروژه کې د پانګونې په موخه د اړینو سپارښتنو د وړاندې کولو ترڅنګ، د هېواد انرژي سکتور د پر ځان بسیاینې او په دې برخه کې د چارو پر چټکتیا باندې ټینګار وکړ.
