سمنګان ولایت کې د خواجه نظر چکډم چارې د درې میلیونه افغانیو په ارزښت پيل شوې
د سمنګان ولایت په فیروز نخچیر ولسوالي کې د خواجه نظر چکډم چارې د درې میلیونه افغانیو په ارزښت د شمال سیندیزې حوزې د عمومي رئیس محترم انجنیر رفیع الله مجتبی، د خلم- ایبک سیندیزې فرعي حوزې رئیس محترم ملا محمد عمر انس او یو شمېر نورو سیمه ییزو مسؤلینو او قومي مشرانو په شتون کې پیل شوې.
د شمال سیندیزې حوزې عمومي رئیس د پراختیایي پروژو په هکله معلومات وړاندې کړل او زیاته یې کړه، چې د دغه چکډم چارې د اوبو او انرژي وزارت په مالي لګښت د ۶ متره په لوړوالي او د ۳۲ متره په اوږدوالي سره جوړیږې، چې د ۸ زره متره مکعب اوبو د ذخیره کولو وړتیا به ولري او زر کسان به ورڅخه برخمن شي.
همدارنګه، د شمال سیندیزې حوزې عمومي رئیس د فیروز نخچیر له ولسوال محترم قاري بلال سره دلېدنې ترڅنګ په دغه ولسوالي کې د دهن درې بند له سیمې څخه هم لیدنه وکړه او د سیمې خلکو ته یې ډاډ ورکړ چې د دغه بند د تخنیکي سروې د ترسره کولو وروسته به یې اړین اسناد د وزارت له مقام سره شریک کړي.
