لغمان ولایت کې د کرنج درې اساسي چکډم څه د پاسه 3 میلیونه افغانیو په لګښت ګټې اخیستنې ته وسپارل شو
د یاد چکډم ګټې اخیستنې ته د سپارلو په مراسمو کې د لغمان والي شیخ شېراحمد حقاني، د لغمان ولایت د اوبو او انرژي رئیس مولوي شېرجان راشيدي، د اېف، جي، او مؤسسې مسؤولینو او یو شمېر قومي مشرانو ګډون کړی و.
ښاغلي حقاني د یاد چکډم له جوړېدو څخه خوښي څرګنده کړه او زیاته یې کړه چې د اوبو د مدیریت په برخه کې به ډېرې هلې ځلې وکړي او د لغمان ولایت د اوبو او انرژي رئيس هم د نوموړي چکډم د تخنیکي ځانګړتیاوو، ټولنیزو او اقتصادي ګټو په هکله ګډونوالو ته بشپړ معلومات وړاندې کړل.
د نوموړي چکډم رغنیزې چارې د ډبلیو، اېف، پي مؤسسې په مالي لګښت او د اېف، جي، او مؤسسې په تخنیکي ملاتړ د لغمان ولایت د اوبو او انرژي ریاست تر څارنې لاندې د 3 میلیونه 400 زره افغانیو په لګښت د درې میاشتو په موده کې بشپړ شو.
دغهٔ چکډم 26 متره اوږدوالی او 4.5 متره لوړوالی لري، چې د 3500 مترمکعبه اوبو د زېرمه کولو وړتیا په لرلو سره 90 هکتاره کرنیزه ځمکه خړوبوي.
د یادولو وړ ده، چې د نوموړي چکډم په رغنیزو چارو کې ګڼ شمېر ځايي اوسېدونکو ته د کار زمینه برابره شوې وه او چې ورسره به د ځمکې لاندې اوبه تغذیه شي، د سېلابونو اوبه به مهار او د طبیعت ښکلا به ورسره څو برابره شي.
