په خوست ولایت کې د وام مقبل کلي چکډم د جوړېدو چارې د 2140000 افغانیو په ارزښت پیل شوې
د خوست ولایت د نادرشاه کوټ ولسوالي د وام مقبل کلي چکډم د جوړېدو چارې د دوه میلیونه، یو سلو څلویښت زره(2140000) افغانیو په ارزښت د یاد ولایت د شمل خرم سیندیزې فرعي حوزې رئيس محترم مولوي عبدالقیوم ثابت او ورسره مل تخنیکي ټیم، د نادرشاه کوټ ولسوال محترم حیات الله کاروان او یو شمیر سیمه ییزو مسئولینو، علماوو او مخورو په شتون کې پیل شوې.
د شمل خرم سیندیزې فرعي حوزې رئیس د نوموړي چکډم د چارو په پرانیست غونډه کې د خوست ولایت اوسیدونکو ته د غوره خدمت رسونې او د لازیاتو عام المنفعه پروژو د پلي کولو ډاډ ورکړ او د قراردادي شرکت څخه یې وغوښتل، چې د نوموړې پروژې چارې دې په ښه کیفیت سره ترسره کړي.
د یادونې وړ ده، چې نوموړی چکډم د اوبو او انرژي وزارت په مالي لګښت د یونیورسل سټار ودانیز شرکت له لوري د 26 متره په اوږدوالي، د تهداب په شمول د 7 متره په لوړوالي، په تهداب کې د 4,5 متره او په سر کې د 60 سانتي متره په سور سره جوړیږي.
نوموړی چکډم د شاوخوا لس زره(10000) متره مکعبه اوبو په ذخیره کولو سره به 235 جریبه کرنیزه ځمکه خړوبه او لسګونه جریبه کرنیزه ځمکه به د سیلابونو له ګواښ څخه خوندي کړي.
