په خوست ولایت کې د یو چکډم د جوړېدو چارې د نږدې دوه(2) میلیون افغانیو په ارزښت پیل شوې
د خوست ولایت د تڼيو ولسوالۍ اړوند د ترخيلو کلي چکډم د جوړېدو چارې د یو میلیون او نه سوه یو اتیا زره درې سوه شپږ نوې(1981396) افغانيو په ارزښت د یاد ولایت د شمل خرم سیندیزې فرعي حوزې رئیس محترم مولوي عبدالقیوم ثابت، د یاد ریاست تخنیکي سلاکار انجنیر مجاهدالله مشفق، يو شمیر سیمه ییزو مسئولینو او د تڼيو ولسوالۍ قومي مشـرانو په شتون کې پیل شوې.
نوموړی چکډم د اوبو او انرژي وزارت په مالي لګښت د 26 مترو په اوږدوالي، د تهداب په شمول د 6,5 مترو په لوړوالي، په تهداب کې د 4 مترو او په سر کې د 80 سانتي مترو په سور سره د مسيد ودانيز شرکت له لوري د دوو مياشتو په موده کې جوړيږي.
په نوموړې پروژې کې لسګونو کاریګرو ته د کار زمینه چمتو کيږي او د چارو په بشپړېدو سره به یې لسګونه جریبه کرنیزې ځمکې د سیلابونو له ګواښ څخه خوندي شي.
د یادونې وړ ده، چې اوسمهال په خوست ولایت کې د څه باندې 16 ميليون افغانیو په ارزښت د 8 چکډمونو د جوړوېدو چارې روانې دي او په یاد ولایت کې به د 7 نورو چکډمونو د جوړېدو چارې هم ډير ژر پیل شي.
