په غزني ولایت کې د یوه بند د جوړولو چارې د ۱۸میلیونه افغانیو په ارزښت پیل شوې
د غزني ولایت دجاغوري ولسوالي د زیرک په کلي کې د یوه منځني بند پروژې چارې د ۱۸ میلیونه افغانیو په ارزښت د غزني سیندیزې فرعي حوزې تخنیکي سلاکار محترم انجنیر محمد نذیر سهار، د یادې ولسوالي ولسوال، امنیه قوماندان او یو شمېر مشرانو په شتون کې پرانیستل شوې.
یاد بند چې د ۱۵ متره لوړوالي ، ۹ متره پلنوالي او په لاندنې برخه کې د ۲۲ متره په اوږدوالي سره جوړیږې د ۹۳ زره متره مکعب اوبو د ذخیره کولو، ۳ کیلو واټه برېښنا د تولید او د ۳۸۰ هکتاره کرنیزې ځمکې د خړوبولو وړتیا به ولري او ۳۸۵ کورنۍ به په مستقیم ډول ورڅخه ګټه پورته کړي.
د یاد بند چارې د سیمې د خلکو په مالي ملاتړ د غزني سیندیزې فرعي حوزې تر څارنې لاندې پرمخ وړل کېږي.
