په لغمان ولایت کې د کابو څوارلس ميليونه افغانيو په ارزښت څلور پروژې ګټې اخيستنې ته وسپارل شوې
د لغمان ولایت په علینګار ولسوالي کې څلور پروژې د کابو څوارلس میلیونه افغانیو په ارزښت د لغمان والي محترم قاري زین العابدین عابد، د لغمان سیندیزې فرعي حوزې رئيس محترم مولوي شیرجان راشدي، د خوړو نړیوال سازمان مسؤلینو او یو شمېر مشرانو په شتون کې ګټې اخیستنې ته وسپارل شوې.
په یادو پروژو کې د سخره کوخي ویالې، د سرخه کوخې، کوندیله نالیار او د ادهار کجګره محافظوي دیوالونو او د شاهي کلي سوپر پسیج جوړول شامل وو.
د نوموړو پروژو چارې د ۹ میاشتو په موده کې بشپړې او ګټې اخیستنې ته و سپارل شوې او په ګټې اخیستنې سره یې د سلګونو کورنیو د اوبو ستونزه هواره او په زرګونو جریبه کرنیزه ځمکه د سیلابونو له خطر څخه خوندي شوه.
یادې پروژې د خوړو نړیوال سازمان په مالي ملاتړ د لغمان سیندیزې فرعي حوزې تر څارنې لاندې پلې شوې، چې پکې سلګونو کسانو ته د کار زمینه چمتو شوې وه.
