په کنړ او بادغیس ولایتونو کې د برېښنا رسولو دوو پروژو د ستونزو د هوارولو او د پاتې چارو د پلي کولو په موخه د همغږي ناسته ترسره شوه
یاده ناسته د وزارت مقام د اقتصادي سلاکار ښاغلي الحاج محمد حارث زرمتي تر مشري لاندې د قراردادي شرکت د استازو او د سترو قراردادونو د رهبري پلاوي له خوا د ټاکل شوې کمیټې د غړو په ګډون ترسره شوه.
په دې ناسته کې په کنړ ولایت کې د منوګي د برېښنا د وېش شبکې د پروژې د پاتې چارو د پلي کېدو او په بادغیس ولایت کې د ۲۱ کلیو لپاره د برېښنا د وېش شبکې د پروژې د وضعیت د څېړلو او ستونزو د هوارولو په هکله بحث او د اندونو تبادله وشوه.
د وزارت اقتصادي سلاکار د یادې ناستې په بهیر کې دغو پروژو ته د خلکو اړتیا او د ملي ګټو ارزښت ته په کتو سره له قراردادي شرکت څخه وغوښتل چې د یادو پروژو د پاتې چارو په پلي کولو کې همکاري وکړي، ترڅو له یوې خوا ملي ګټې خوندي شي او له بلې خوا پانګوال په یادو پروژو کې پانګونې ته وهڅول شي.
په ورته مهال، د قراردادي شرکت استازو هم د خپلو همکاریو په هکله ډاډ ورکړ او ژمنه یې وکړه چې په یادو پروژو کې يې اړین تخفیف په پام کې نیولی او خپلې ټولې هڅې به د پروژو د پاتې چارو په پلي کولو کې په کار واچوي، ترڅو زمونږ هېوادوال د برېښنا له نعمت څخه برخمن شي.
