پکتیا ولایت کې د اوبو لګولو دوه پروژې د نږدې دوه سوه څلوېښت زره ډالرو په ارزښت ګټې اخیستنې ته وسپارل شوې
د اوبو او انرژي د سرپرست وزیر محترم ملا عبداللطیف منصور، د پکتیا سیندیزې فرعي حوزې رئيس محترم مولوي محمد کریم فاتح، د لوګر سیندیزې فرعي حوزې رئيس محترم ملا اسماعیل آخندزاده، د اړیکو دفتر موسسې عمومي مسؤل محترم محمد رحیم خوستي او یو شمېر نورو سیمه ییزو مسؤلینو په شتون کې د پکتیا ولایت د مرکز اړوند د تیرې په سیمه کې د ټنډانو سربند پروژه چې څلور سوه کورنۍ ورڅخه استفاده کوي او روحاني بابا ولسوالي کې د کني کانال پروژه چې درې کیلو متره اوږدوالی لري او ۲۰۰۰ هکتاره ځمکه خړوبوي د دوه سوه اووه دیرش زره او نهه سوه نوې (۲۳۷۹۹۰) ډالرو په ارزښت ګټې اخیستنې ته وسپارل شوې.
د نوموړو پروژو په مراسمو کې د اوبو او انرژي سرپرست وزیر د اوبو د مدیریت په برخه کې خبرې وکړې او د اوبو مدیریت یې د هېواد لپاره یو ستر اقتصادي عامل یاد کړ. نوموړې د هېواد د آبادۍ په برخه کې د مسلکي قشر ونډه بنسټیزه وبلله او زیاته یې کړه، چې اوس په هېواد کې د امن فضا رامنځته شوې ؛ د پروژو د پلي کولو او د پانګونې لپاره تر ټولو ښه فرصت چمتو شوی دی.
همدارنګه د اوبو او انرژي سرپرست وزیر د کني او ګاویان د اوبو د ذخیروي بندونو له سیمو څخه هم لیدنه وکړه.
د یادونې وړ ده، چې د ټنډانو د سربند پروژه د سویس د پراختیايي همکارې ادارې په مالي ملاتړ د اړیکو دفتر همکارې موسسې له لوري او د کني کانال پروژه دسولې رېښې موسسې له لوري د پکتیا سیندیزې فرعي حوزې تر څارنې لاندې پلې شوې.
