کابل ته د پنجشير د اوبو د لېږد او د اوبو د تصفیې شرکتونو ته د جوازونو د وېش پر څرنګوالي د همغږي او پانګونې د جلبولو په موخه غونډه جوړه شوه
دغه غونډه د اوبو او انرژي وزارت د اوبو چارو د تنظیم عمومي رئیس ښاغلي انجنیر عبدالغفور "عمري" په مشري چې پکي د دغه وزارت یو شمېر رئیسانو، د سوداګرۍ او صنایعو وزارت، د عامې روغتیا وزارت او د کابل ښاروالۍ استازو ګډون کړی و، اوبو او انرژي وزارت کې ترسره شو.
په دې غونډه کې د اوبو او انرژي وزارت ، د سوداګرۍ او صنایعو وزارت، د عامې روغتیا وزارت او د کابل ښاروالۍ استازو د پنجشیر له سیند څخه کابل ته د اوبو د انتقال پر څرنګوالي ، د اوبو تصفیې شرکتونو ته د جوازونو د ویشلو او د اوبو د تصفیې شرکتونو د جوازونو د غځیدو پر څرنګوالي بحث او د نظر تبادله وکړه.
د اوبو او انرژي وزارت د اوبو چارو د تنظیم عمومي رئیس ښاغلي انجنیر عبدالغفور "عمري" د یاد وزارت د اوبو سرچینو رئیس ښاغلي انجنیر فایزالرحمن "عزیزي" په کابل کې د ځمکې لاندې اوبو د سطحې په اړه هر اړخیز معلومات وړاندې کړل او همدارنګه د اوبو د تصفیې شرکتونو ته د جواز ورکولو پروسې په اوږدمهاله او لنډ مهاله توګه خبرې وکړې.
د غونډې په پای کې پرېکړه وشوه، چې د اوبو او انرژي وزارت، د سوداګرۍ او صنایعو وزارت، د عامې روغتیا وزارت او د کابل ښاروالۍ د استازو په ګډون دې د هغو شرکتونو سره چې غواړي د اوبو د تصفیې په برخه کې پانګونه وکړي، ګډه غونډه جوړه شي.
