کاپيسا ولایت کې د خرم کانال د پاکاري چارې پيل شوې
کاپیسا ولایت کې د خرم کانال د پاکاري چارې د اوبو د منظم بهیر او غوره مدیریت په موخه د کاپیسا سیندیزې فرعي حوزې ریاست او د نوموړي کانال د اوبو ګټې اخیستونکو ټولنې د مسؤلینو په شتون کې پیل شوې.
نوموړی کانال چې د کاپیسا ولایت د مرکز او د لومړۍ او دوهمې حصې ولسوالیو کرنیزې ځمکې خړوبوي، ۵۲ کیلو متره اوږدوالی او ۵.۵ متره سور لري، چې شاوخوا ۲۱ زره کورنۍ او ۲۵۰ کلي ورڅخه ګټه پورته کوي او د څه باندې ۶ زره هکتاره ځمکې د خړوبولو وړتیا لري.
د دغه کانال د پاکاري چارې د اوبو ګټې اخیستونکو ټولنې په مالي لګښت د کاپیسا سیندیزې فرعي حوزې ریاست تر څارنې لاندې پرمخ وړل کېږي.
