په خوست ولایت کې د لیژې کلي ذخیروي بند د جوړېدو چارې د ۹.۴ میلیونه افغانیو په ارزښت پیل شوې
د خوست ولایت د ګربزو ولسوالي اړوند د لیژې کلي ذخیروي بند د جوړېدو چارې د نه اعشاریه څلور (۹.۴) میلیونه افغانیو په ارزښت د کابل سیندیزې حوزې عمومي رئیس محترم انجنیر حبیب الرحمن حقپال، د خوست شمل خرم سیندیزې فرعي حوزې رئیس محترم مولوي عبدالقیوم ثابت او یو شمېر سیمه ییزو مسؤلینو، علماوو او مخورو په شتون کې پیل شوې.
د خوست شمل خرم سیندیزې فرعي حوزې رئیس د نوموړې پروژې د چارو د پیل په مراسمو کې د یاد کلي اوسیدونکو ته ډاډ ورکړ، چې د نوموړې پروژې د چارو له بهیر څخه به په جدي توګه څارنه وکړې، ترڅو چارې یې په غوره کیفیت او معیاري توګه ترسره شي.
د یادونې وړ ده، چې نوموړی ذخیروي بند د اوبو او انرژي وزارت په مالي لګښت سره د ۴۵ متره په اوږدوالي، د تهداب په شمول ۱۲.۳۷ متره په لوړوالي، په تهداب کې د ۲۹.۸۰ متره او په سر کې د ۴ متره په سور سره جوړېږي، چې د ۱.۲ کیلومتره آبګیر ساحې په درلودلو سره به د ۹۷۰۰۰ متره مکعب اوبو د زیرمه کولو وړتیا ولري، په کلني ډول به شاوخوا د ۱۱۰۰۰۰ متره مکعب په اندازه د ځمکې لاندې اوبه تغذیه شي او ۲۵ هکتاره کرنیزه ځمکه به هم د سیلابونو له ویجاړیو څخه خوندي او د سیمې ګڼ شمېر خلکو ته د کار زمینه برابره شي.