نړیوال بانک د افغان حکومت د اقتصادي او انکشافي برنامو ملاتړ وکړ
د افغانستان د اسلامي جمهوریت جمهور رئیس محمد اشرف غني نن ماښام د سویلي اسیا په چارو کې د نړیوال بانک مرستیال هارتویګ شیفر او مل پلاوي سره په کتنه کې د مرستو او له افغانستان څخه د یاد بانک د ملاتړ په اړه بحث او خبرې وکړې.
په دغه کتنه کې چې په ارګ کې وشوه او په افغانستان کې د نړیوال بانک رئیس هم حضور درلود، جمهوررئیس غني د افغان حکومت ملي برنامې په ځانګړي ډول د پوهنې، کانونو، ګمرکونو او عوایدو زیاتولو او د افغانستان د اقتصادي لرلید په برخو کې انکشافي برنامې تشریح کړې.
جمهوررئیس د افغان حکومت د اصلاحاتو پر بستې هم خبرې وکړې وې ویل، د اصلاحاتو منطق د حکومتي بنسټونو د غوره خدمتونو وړاندې کول او د موثریت او ظرفیت لوړول دي.
جمهوررئیس غني څرګنده کړه، د اصلاحاتو راوستو لپاره جدي تعهد لرو او له اصلاحاتو څخه زموږ موخه د موثرو، یو برابر او د ټکنالوژۍ پر مبنا د خدمتونو وړاندې کول دي.
جمهوررئیس غني پر تجدید وړ انرژۍ پانګونې، د اوبو بندونو پر جوړولو او مدیریت، د بې وزلۍ راکمولو پر مبازرې، د کرنیزو محصولاتو پر زیاتولو او د کرنیز پیداوار ځنځيري ارزښت ته پر پاملرنې ټینګار وکړ.
د افغانستان د اسلامي جمهوریت جمهوررئیس د دې په بیانولو سره چې د لومړي ځل لپاره زموږ صادرات تر یو میلیارد ډالرو زیات شوي وویل، موږ به د افغانستان د برېښنا پر پروژو زیاته پانګونه وکړو.
د هیواد جمهوررئیس د سیمه ییز اتصال پر ارزښت ټینګار وکړ او وې ویل، د افغان حکومت لپاره سیمه ییز اتصال او په سیمه کې اقتصادي او ترانزیټي هڅې مهمې دي.
په دغه کتنه کې د سویلي اسیا په چارو کې د نړیوال بانک مرستیال یو ځل بیا د جمهوررئیس او افغان حکومت له اقتصادي او انکشافي برنامو څخه د نړیوال بانک ملاتړ څرګند کړ
