د نرخ ولسوالۍ په بېلابېلو سیمو کې د کانالونو او کاریزونو د بیارغونې او پاکولو څلور پروژې پیل شوې
د میدان وردګ ولایت د نرخ ولسوالۍ اړوند د غوزبې، کانعزت، قعله شادي کانالونه او د سرکې کاریز چې تېر کال د ډېرو اورښتونو او سېلابونو له کبله تخریب او بند شوي ؤ، نن یې د بیارغونې او پاکولو په موخه د کار په بدل کې د خوراک پرګرام له مخې کارونه پیل شول.
د یادو پروژو د کارونو د پیل پرمهال د ولایت والي حافظ محمد امین عمري وویل: دغه ولایت یو کرنیز ولایت دی، ولایتي اداره هڅې کوي، د کرنې او سیندیزې حوزې له مسؤلینو سره په ګډه په میدان وردګ ولایت کې د بزګرانو ستونزې حل او کرنیزو ځمکو ته د اوبو رسولو په برخه کې ذخیره وي بندونه د جوړولو پروژې پیل کړو.
په ورته وخت کې د سیندیزې حوزې رییس انجینر اسماعیل عمار مموزي وویل: د دغه څلورو پروژو لپاره د ولایتي ادارې په ځانګړې لارښوونه (۲۶) ټنه غنم ځانګړي شوي چې شا او خوا (۳۰۰) خلکو ته به د کار زمینه برابره شي، چې هر کارکوونکي ته به د ورځې (۱۰) کیلو ګرامه غنم ورکول کیږي.
