د ډبرو له سکرو څخه د بريښنا د توليد کميټې دويمه غونډه ترسره شوه
دغه غونډه د اوبو او انرژي وزارت د سرپرست وزیر ښاغلي ملا عبداللطیف "منصور" په مشري چې د دغه وزارت یو شمیر رئیسانو او د اقتصاد وزارت معین، د عدلیې وزارت معین، د سوداګرۍ او صنایعو وزارت ،د کانونو او پټرولیم وزارت، د چاپېریال ساتنې ملي ادارې، د افغانستان بانک، د افغانستان برېښا شرکت، د معادن او صنایعو خونې، د سوداګرۍ او پانګونې خونې د استازو په ګډون د اوبو او انرژی په وزارت کې ترسره شوه.
په دې ناسته کې، د ډبرو له سکرو څخه د برېښنا د تولید د کمېټې د جوړښت او کړنلارې ، د سهامي شرکت د جوړښت، د ډبرو سکرو د پلورلو د بیې په ټاکلو، د ډبرو له سکرو سرچینو څخه د برېښنا د تعرفې په ټاکلو، د فابریکو لپاره د مشخصو ځایونو د جوړولو ، د ډبرو له سکرو څخه د برېښنا تولید، پانګوالو ته د آسانتیاوو برابرولو او یو شمېر نورو اداري او تخنیکي موضوعګانو باندی بحث او د نظر تبادله وشوه.
د غونډې په پای کې پریکړه وشوه ، چې د ډبرو له سکرو څخه دبرېښنا د تولید د عملي چارو د چټکتیا په موخه دې یوه ګډه تخنیکي کمیټه د اوبو او انرژي وزارت، د کانونو او پټرولیم وزارت، د سوداګرۍ او صنعت وزارت، د افغانستان برېښنا شرکت، د چارو ادارې د پانګونې د آسانتیاوو واحد او د ځمکو ریاست څخه جوړه شي.
د یادولو وړ ده چې د ډبرو له سکرو څخه د بریښنا د تولید کمېټه د افغانستان د اسلامي امارت د اقتصادي کمیسیون د رهبري د هدایت په اساس جوړه شوې ده چې مشري یې د اوبو او انرژي د سرپرست وزیر ښاغلی ملا عبداللطیف "منصور" په غاړه ده اود سوداګرۍ او صنایعو وزارت، د کانونو او پټرولیم وزارت، اقتصاد وزارت، عدلیې وزارت، د چاپیریال ساتنې ملي اداره، د معادن او صنایعو خونه، د سوداګرۍ او صنایعو خونه، د افغانستان برېښنا شرکت، د پانګونې د آسانتیاوو اداره او د افغانستان بانک، د دې کمیټې غړي دي او دا د ډبرو له سکرو څخه د بریښنا د تولید د کمیټې دویمه غونډه ده چې د اوبو او انرژي وزارت د سرپرست وزیر په مشري جوړیږي.
