د انرژي زونونو آمرینو ته د لمریزې او بادي سرچینو څخه د برېښنا د تولید لومړنۍ سروې فورمونو په هکله ښوونیز پروګرام وړاندې شو
یاد پروګرام چې د پایدارې انرژي ریاست او د انرژي زونونو د انسجام ریاست له خوا ترسره شوی وو، د انرژي زونونو آمرینو ته د لمریزې او بادي سرچینو څخه د برېښنا د تولید لومړني سروې فورمونو په هکله لازم معلومات وړاندې شول.
په دې ورکشاپ کې د پایدارې انرژي رئيس ښاغلي مؤمن بسمل په کره توګه د پروژو سروې په ترسره کولو باندې ټینګار وکړ او یادونه یې وکړه چې اوسمهال د پروژو په ساحو کې بشپړ امنیت موجود دی او انجنیران باید په ټولو ولسوالیو او ولایتونو کې د پروژو د سروې پر وخت د لازیاتې پاملرنې څخه کار واخلي.
همدارنګه د انرژي زونونو د انسجام رئيس ښاغلي محمد حکیم سمسور د لومړنیو تخنیکي سروې ګانو د لا ښه ترسره کولو لپاره د انرژي زونونو آمرینو ته لازم هدایات ورکړل.
