د کرهڼې او اقتصاد وزارتونو له استازو سره د اوبو چارو د تنظیم اړوند طرحو په هکله د نظر غوښتنې ناسته ترسره شوه
په یاده ناسته کې، د کرهڼې او اقتصاد وزارتونو د استازو د اوبو او انرژي وزارت له تخنیکي مسؤلینو سره د « د کابل ښاریانو لپاره د څښاک اوبو د برابرولو طرحې، د ځمکې لاندې اوبو د تعرفې یا اجورې څخه د ګټي اخیستنې طرحې، د باران اوبو د راټولو په موخه د ځمکې لاندې اوبو د تغذیې طرحې، د کرهڼې او سرسبزي په موخه د فاضلابو د تصفیې څخه د ګټې اخیستنې طرحې او د اوبو د سپما په هکله د عامه پوهاوي طرحې په هکله بحث او د نظر تبادله وشوه. د يادولو وړ ده، چې څه موده وړاندې د یادو طرحو په هکله د نظر غوښتنې ناسته د اړوندو وزارتونو او ادارو د استازو سره په عمومي توګه ترسره شوې وه، او پکې پرېکړه شوې وه چې د هر وزارت استازي په جلا توګه د یادو طرحو له کميټې سره په ګډه د اړوندو وزارتونو او ادارو له استازو سره د دوی پر اړینو او اغېزمنو اندونو په شاملولو باندې کار وکړي.
